नेपाली राष्ट्रिय महिला ह्याण्डबल टोलीलाई खेल पोसाक प्रदान

नेपाली राष्ट्रिय महिला ह्याण्डबल टोलीलाई खेल पोसाक प्रदान

कास्की । आगामी असोज ६ देखी २३ गतेसम्म मित्रराष्ट्र चीनको होङझावमा हुने १९ औँ एशियाली खेलकुद(एशियाड) का लागि नेपाली टोलीले तयारी गरिरहेको छ । 

तयारीस्वरुप गण्डकी प्रदेशको राजधानी शहर पोखरामा चार खेलको बन्द प्रशिक्षण सञ्चालन भइरहेको हो । महिला ह्याण्डबल, पुरुष रग्बी, आर्चरी र भारत्तोलन खेलका खेलाडीले पोखरामा बन्द प्रशिक्षण लिइरहेका छन् । बन्द प्रशिक्षणमा रहेको राष्ट्रिय महिला ह्याण्डबल टोलीलाई आज खेल पोसाक(ट्रायक) प्रदान गरिएको छ ।

पोखरामा सामाजिक क्षेत्रमा महिलाका क्षेत्रमा काम गर्दै आएको वुमन्स क्लबले टिमका १६ खेलाडी र दुई प्रशिक्षकलाई खेल पोसाक प्रदान गरेको हो । खेलाडीलाई आवश्यक सामग्री अभाव नहोस् भनेर सो सहयोग गरिएको बताइन्छ । 

ह्याण्डबल टोलीका प्रशिक्षक विन्दा थापाले टोलीले साउन पहिलोसातादेखी पोखरामा बन्द प्रशिक्षण सञ्चालन गरिरहेको बताइन् । उनले टोलीका सबै खेलाडी एशियाडका लागि उत्साहित भएको र सकारात्मक नतिजाका लागि खेल्ने उल्लेख गरीन् ।