विद्युत प्राधिकरणको उत्पादन क्षमता २६ सय ८४ मेगावाट पुग्यो

विद्युत प्राधिकरणको उत्पादन क्षमता २६ सय ८४ मेगावाट पुग्यो

काठमाडौ । नेपालको विद्युत उत्पादन क्षमता २ हजार ६ सय ८४ मेगावाट पुगेको छ । गत आर्थिक वर्ष २०७९/८० मा विभिन्‍न जलविद्युत आयोजना निर्माण सम्पन्न भइ ४९१ मेगावाट विद्युत प्राधिकरणको प्रणालीमा थप भएर कुल जडित उत्पादन क्षमता २ हजार ६ सय ८४  पुगेको हो ।

गत वर्ष सुख्खायाममा प्राधिकरण तथा स्वतन्त्र विद्युत उत्पादकहरुको विद्युत उत्पादन केन्द्रबाट प्रक्षेपण गरिएभन्दा कम विद्युत उत्पादन भएकोले केही बढी परिमाणमा विद्युत आयात गरिएको थियो ।

नेपाल विद्युत प्राधिकरणको ३८ औ वार्षिक उत्सवमा बोल्दै प्राधिकरणका कार्यकारी निर्देशक कुलमान घिसिङले गत वर्ष पनि पनि विद्युत उत्पादनमा बृद्धि, प्रसारण तथा वितरण लाइन विस्तार, विद्युत खपतमा वृद्धि र स्वदेशमा खपत हुन नसकेको विद्युत निर्यात गर्न सफल भएका बताए ।

घिसिङले अघिल्लो आ.व. मा १५.३८ प्रतिशत रहेको विद्युत चुहावटलाई घटाइ आ.व २०७९/८० मा १३ प्रतिशतमा झार्न सफल भएक उल्लेख गरे ।घिसिङका अनुसार यो प्राधिकरणको इतिहासमा हाल सम्मकै न्यून विद्युत चुहावट हो ।

सामुदायीक ग्रामिण विद्युतीकरणबाट विद्युत सेवा उपभोग गरिरहेका ५ लाख १० हजार ग्राहक सहित राष्‍ट्रिय ग्रीडबाट विद्युत सेवा उपभोग गर्ने ग्राहकको संख्या ५६ लाख ४० हजार पुगेको छ। हाल राष्‍ट्रिय ग्रीडको पहुँचबाट ९५ प्रतिशत र साना तथा लघु जलविद्युत आयोजना एवम् सौर्य विद्युतबाट ३ प्रतिशत गरी जम्मा ९८ प्रतिशत जनताले विद्युत सेवा प्राप्‍त गरिरहेका छन् । अघिल्लो वर्षको तुलनामा विद्युत खपत पनि साढे ५ प्रतिशतले बढेर ९ अर्ब ३५ करोड युनिट पुगेको छ। गतवर्ष स्वदेशी जलविद्युतको उत्पादन कम हुँदा बढी बिजुली आयात गर्नुपरेको थियो जसका कारण प्राधिकरणको नाफा अघिल्लो वर्षको तुलनामा घट्न गएको छ ।