पोखराबाट काठमाडौं उड्न लागेको बुद्ध एयरको ढोका खुलेपछि...

पोखराबाट काठमाडौं उड्न लागेको बुद्ध एयरको ढोका खुलेपछि...

काठमाडौँ । पोखराबाट काठमाडौं उड्न लागेको बुद्ध एयरको जहाजको ढोका खुलेको छ। बिहीबार बिहान ९ बजे बुद्ध एयरको उडान नम्बर ६५२ को इन्जिन स्टार्ट भएपछि आपतकालीन ढोका खुलेको थियो।

बुद्ध एयरका सूचना अधिकारी दीपेन्द्र कर्णका अनुसार जहाजको ढोका यात्रुले खोलेको पाइएको छ। यात्रुबाट के कति कारणले ढोका खुल्न गएको हो, यसबारे पोखरा टर्मिनलका सुरक्षाकर्मीले अध्ययन गरिरहेका पनि बुद्ध एयरले जनाएको छ ।

ढोका खोलेको विमान बुद्धएयरका प्राविधिकले जाँच गरिरहेको र काठमाडौं आउने यात्रुलाई अर्को विमानबाट ल्याउन लागेको पनि बुद्ध एयरले स्पष्ट पारेको छ ।

यसबारे जहाजमा प्राविधिक टोलीले पनि निरीक्षण गरेको छ। यात्रुहरूलाई अर्को जहाजमा राखेर काठमाडौं ल्याउने तयारी भइरहेको उनले बताए। जहाजमा रहेका यात्रु यादव देवकोटाले सामाजिक सञ्जाल एक्समा लेख्दै जहाजको आपतकालीन ढोका भित्र आएको उल्लेख गरेका छन्। ‘प्लेन स्टार्ट भएपछि इमरजेन्सी ढोका स्वाट्ट भित्र आयो,’ उनले लेखेका छन्।