सिन्धुलीमा महिलालाई पोलमा बाँधेर बेहोस हुने गरी कुटपिट, प्रहरीद्वारा उद्धार

सिन्धुलीमा महिलालाई पोलमा बाँधेर बेहोस हुने गरी कुटपिट, प्रहरीद्वारा उद्धार

सिन्धुली । लेनदेनको विषयलाई लिएर कमलामाई नगरपालिका–४, सिन्धुलीमा एक महिलालाई पोलमा बाँधेर निर्घात कुटपिट गरिएको छ ।

स्थानीय शारदा थापामाथि अमानवीय व्यवहार भएको सूचना पाएपछि आइतबार प्रहरी प्रमुख एसपी राजकुमार सिलवाल नेतृत्वको टोली गाउँमा पुगेको थियो । बाँधेर राखेकै अवस्थामा उनको उद्दार गरेर ल्याएर सेफ होममा राखेको प्रहरी प्रमुख एसपी राजकुमार सिलवालले बताए  गाउँबाट उनका श्रीमानसहित ७ जनालाई पक्राउ गरेका  सिलवालले बताए ।  ‘उद्दार गरेर ल्याउँदा उहाँ बेहोस अवस्थामा हुनुहुन्थ्यो, शरीरमा निलडामहरु थिए ।’ उनले भने ।

ऋणको विषयमा थापालाई गाउँलेले कुटपिट गरेको स्रोतले बतायो । घर अगाडी रहेको बिजुलीको पोलमा बाँधेर थापामाथि आफन्तैबाट कुटपिट भएको हो । कमलामाई नगरपालिका वडा नम्बर ४ का वडाध्यक्ष महेन्द्र प्रसाद ढकालले आइतबार बिहान आफूसँगको भेटमा ऋण तिर्ने सहमति भएको जानकारी दिए । उनले भने, 'पछिल्लो कुटपिटको घटनाबारे मलाई विस्तृत जानकारी भएन । बिहान अदालतमा रहेको मुद्दा फिर्ता लिने र ऋण तिर्दै जाने सहमति भएको थियो । बेलुका के भयो त्यो बुझ्नै पर्छ ।’
कुटपिटबाट बेहोस भएकी थापालाई राति उपचारका लागि सिन्धुली अस्पताल पुर्‍याइएको थियो । अस्पतालका अनुसार उनको हड्डी टुटफुट भएको छैन, तर मासुमा चोट देखिएको छ । बेहोस भएका कारण उनको सिटिस्क्यान गरेर हेर्नु पर्ने अस्पतालले जनाएको छ ।

घटनापछि प्रहरीले अनुसन्धानका लागि थापाका श्रीमान सहित केही व्यक्तिलाई नियन्त्रणमा लिएको छ । प्रहरी उपरीक्षक सिलवालले भने, ‘महिलालाई पोलमा बानेको अवस्थामा रेस्क्यु गरेको हो । कसले गर्‍यो ? किन गर्‍यो ? यो अनुसन्धानकै क्रममा छ । शङ्कास्पद केही मान्छेलाई नियन्त्रणमा लिएका छौँ । श्रीमान् पनि नियन्त्रणमा छ । अनुसन्धान गर्न बाँकी छ ।’

सिन्धुलीका प्रमुख जिल्ला अधिकारी भरत खनालले गम्भीर विषय भएकाले प्रहरीले घटनाबारे अनुसन्धान गरी रहेको जानकारी दिए । उनले भने, ‘यो केसलाई सिरियस्ली हेर्दिनु पर्यो भनेर एसपी साबलाई भनेको छु ।’ थापा दम्पती बिच विवाद भएर सम्बन्ध विच्छेदको लागि सिन्धुली जिल्ला अदालतमा मुद्दा चलिरहेको छ ।