सत्तापक्ष नै प्रतिपक्षलाई धम्क्याईरहेको छ: नेता केसी
सत्तापक्ष नै प्रतिपक्षलाई धम्क्याईरहेको छ: नेता केसी
एभरेष्ट हेडलाइन्स
एभरेष्ट हेडलाइन्स
काठमाडौँ । नेपाली कांग्रेसका नेता अर्जुन नरसिंह केसीले सत्ता पक्ष नै संविधानलाई चुनौती दिने गरी सामाजिक सद्भाव र जातीय सन्तुलनमा खलल पुग्ने काम गर्न थालेको आरोप टिप्पणी गरेका छन् ।
बिहीबार काठमाडौंमा आयोजित प्रजातान्त्रिक विचार समाजको २६औँ साधारण सभामा नेता केसीले भने, ‘सत्ता पक्षबाट नै हाम्रो सामाजिक सद्भाव र जातीय सन्तुलनमा खलल पुग्ने कामहरू हुन थालेका छन् ।’
उनले नेपाली कांग्रेसले गम्भीर विषयलाई लिएर संसद् अवरोध गरेको उल्लेख गर्दै एमालेले आफूहरूलाई धम्काएको आरोप लगाए ।
‘संविधान भित्रै बसेर संविधानलाई चुनौती दिने प्रवृत्तिहरू देखिन थालेका छन् । लोकतन्त्रमा लोकतान्त्रिक प्रतिपक्षलाई धम्क्याउने, हप्काउने र तर्साउने खालका अभिव्यक्ति सत्तापक्षकै एउटा घटकले दिइरहेको छ,’ केसीले भने ।
यस्तै उनले एमाले विगतमा सबैभन्दा धेरै चार महिनासम्म संसद् अवरोध गर्ने पार्टी भएको उल्लेख गर्दै अहिले लोकतन्त्रमाथि नै खतरा आएको बताए ।
उनले भने,‘अहिले हामीले नेपाली जनताको आवश्यकताको दृष्टिकोणले लाखौँ लाख सहकारी पीडितहरूको प्रतिनिधित्व गर्नको निम्ति संसदीय समितिको माग गरेका छौँ । उहाँहरूले नै सुन काण्डमा २२ दिन संसद् बन्द गरेको इतिहास सुने पनि हुन्छ । यो खालका धम्कीहरू, सर्वोच्च अदालतले गरेका निर्णयहरूलाई चुनौती दिने अभिव्यक्तिहरूले लोकतन्त्र माथि नै चुनौती दिने खालको जुन अवस्था छ, यसलाई कांग्रेसले गम्भीर भएर समीक्षा गर्नुपर्छ ।’
