संसदीय छानबिन समिति गठन : कार्यदलमा कार्यादेशमै कुरा नमिलेपछि संसद् बैठक अनिश्चित

संसदीय छानबिन समिति गठन : कार्यदलमा कार्यादेशमै कुरा नमिलेपछि संसद् बैठक अनिश्चित

काठमाडौँ । संसदीय छानबिन समिति बनाउन कार्यादेश निर्माण गर्न बनेको कार्यदलमा सहमति नजुटेपछि प्रतिनिधि सभा बैठक अनिश्चित बनेको छ । सहकारीको बचत अपचलन, ठगी, दुरूपयोग र हिनामिनामा संसदीय छानबिन समिति बनाउने सहमतिमा दलहरू पुगे पनि क्षेत्राधिकारबारे सहमति नबनेपछि कार्यदलको बैठक फेरि बस्ने भन्दै बिनानिष्कर्ष सकिएको छ । यसले प्रतिनिधि सभा र राष्ट्रिय सभा बैठक अनिश्चित बनेको छ ।

क्षेत्राधिकार टुंगो लगाउन बिहानदेखि दिउँसो २ बजेसम्म सिंहदरबारमा बसेको कार्यदलको बैठकमा सहमति जुट्न नसकेको कार्यदल संयोजक कानुनमन्त्री पदम गिरीले जानकारी दिए । कांग्रेसले समय माग गरेपछि अहिले बैठक स्थगित भएको उनले बताए ।

कांग्रेसले कार्यादेशमा गृहमन्त्रीकै नाम उल्लेख गरिनुपर्ने अडान राखेको कार्यदल सदस्य एमाले प्रमुख सचेतक महेश बस्तौलाले जानकारी दिए । दलहरू सहमति नजिकै पुगेको उनले बताए ।

संसदीय समितिको क्षेत्राधिकारका विषयमा केही सहमति जुट्न बाँकी रहेको उनको भनाइ छ । दलहरूबीच कार्यादेशमा सहमति नहुँदा प्रतिनिधि सभा र राष्ट्रिय सभा बैठक अनिश्चित बनेको छ । दिउँसो २ बजेका लागि प्रतिनिधि सभा बैठक सारिएको थियो।

कांग्रेस प्रमुख सचेतक रमेश लेखकले संसदीय छानबिन समितिका कार्यादेश टुंगो नलगाई सदनका कार्यसूचीमा प्रवेश गर्ने अवस्था नभएको बताए । कांग्रेसले गृहमन्त्रीको नाम, ठगीमा परेका सहकारीका नाम पनि उल्लेख गरिनुपर्ने विषय राखेको छ भने एमाले र रास्वपाले व्यक्ति नतोक्न अडान लिइरहेका छन्।

सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै कांग्रेसले संसदीय छानबिन समिति गठनको माग गर्दै आएको छ।