रुकुम पूर्वबाट चुनाव लड्न प्रचण्डलाई जिल्ला नेताहरूको प्रस्ताव

रुकुम पूर्वबाट चुनाव लड्न प्रचण्डलाई जिल्ला नेताहरूको प्रस्ताव

काठमाडौँ । आगामी फागुन २१ मा हुने प्रतिनिधिसभा सदस्य निर्वाचनमा नेपाली कम्युनिस्ट पार्टीका संयोजक पुष्पकमल दाहाल प्रचण्डलाई रुकुम पूर्वबाट निर्वाचन लड्न जिल्ला नेताहरूले प्रस्ताव गरेका छन् ।
आइतबार प्रचण्ड निवासमा रुकुम पूर्वबाट प्रतिनिधित्व गर्ने केन्द्रीय सदस्य, तीन पालिकाका निर्वाचित अध्यक्ष सहितका प्रतिनिधि मण्डलले उक्त प्रस्ताव गरेका हुन् । 

माओवादी जनयुद्धको आधार क्षेत्र रहेको रुकुम पूर्वमा २०६४ सालदेखि नै नेकपा माओवादी केन्द्रले जित्दै आएको छ ।नेताहरूले राखेको प्रस्तावमा प्रचण्ड सकारात्मक देखिएपनि यहीँबाट निर्वाचन लड्नेबारे कुनै जवाफ नदिएको पूर्वमन्त्री तथा स्थायी समिति सदस्य कमला रोकाले जानकारी दिइन् ।

रुकुम पूर्वबाट चुनाव लड्न सबैले आग्रह गर्नुभएको छ । तर निश्चित भने भएको छैन । पार्टीभित्र छलफल गरेर जवाफ दिन्छु भन्नुभएको छ’, उनले भनिन् ।

प्रचण्ड निवासमा जिल्लाका १५ जना केन्द्रीय सदस्य, तीन जना पालिका अध्यक्ष लगायत सहभागी भएका थिए । नेपाली समाज भारतले आयोजना गरेको एकता सन्देश सभामा भाग लिन नयाँ दिल्ली प्रस्थान गर्नुअघि प्रचण्डले जिल्लाबाट प्रतिनिधित्व गर्ने नेताहरू छलफल गरेका थिए ।

जिल्लाले सिफारिस गरेर पठाएको उम्मेदवारको नाममा प्रचण्डको नाम छैन । उनी रुकुम पूर्वबाट उठ्न चाहेमा सबै जनाले उम्मेदवारी फिर्ता लिन तयार भएको अर्का एक नेताले बताए । 

सोही जिल्लाबाट उम्मेदवारमा सिफारिस हुनेमा केन्द्रीय कार्यालयका मुख्यसचिव गणेशमान पुन, केन्द्रीय सदस्यहरू दलजित शेर्पाली, तेजबहादुर ओली, जितमान पुन ’मार्शल’, सुबोधराज शेर्पाली, लालबहादुर विष्ट, कैलाश मल्ल, चन्द्र रसाइली र सर्जना कार्की रहेका छन् ।