काठमाडौं । जनमत पार्टीले स्थानीय तहको अधिकार तथा स्वायत्तता कार्यान्वयनको माग राख्दै काठमाडौंको माइतीघर मण्डलामा विरोध प्रदर्शन आयोजना गरेको छ।

पार्टीका नेता–कार्यकर्ता तथा समर्थकहरू सम्मिलित उक्त प्रदर्शनमा 'कांग्रेस–कम्युनिस्टले ठगे', 'बालेन, नठग', 'स्वायत्तता दिने आफ्नो वाचा पूरा गर', 'स्थानीय सरकारलाई अधिकार दे' लगायतका नारासहित प्लाकार्ड प्रदर्शन गरिएको थियो।

प्रदर्शनकारीहरूले संघीय लोकतान्त्रिक गणतन्त्रको भावनाअनुसार स्थानीय तहलाई संविधानले प्रदान गरेको अधिकार पूर्णरूपमा कार्यान्वयन हुनुपर्ने, स्थानीय सरकारलाई आवश्यक स्रोत–साधन र निर्णय गर्ने अधिकार सुनिश्चित गरिनुपर्ने तथा जनतासँग गरिएका वाचाहरू पूरा गर्नुपर्ने जोडदार माग उठाएका थिए।

प्रदर्शनकारीहरूले विभिन्न राजनीतिक दलहरूले निर्वाचनका बेला गरेका प्रतिबद्धता कार्यान्वयन नगरेको आरोप लगाउँदै स्थानीय स्वायत्तता र जनउत्तरदायी शासन व्यवस्थालाई सुदृढ बनाउन सरकार गम्भीर हुनुपर्ने बताएका थिए। माइतीघर मण्डलामा सम्पन्न प्रदर्शनका क्रममा सहभागीहरूले शान्तिपूर्ण ढंगले नाराबाजी गर्दै स्थानीय तहको अधिकार कटौती नगर्न र संघीयताको प्रभावकारी कार्यान्वयन गर्न सरकारको ध्यानाकर्षण गराएका थिए।

जनमत पार्टीले संघीय संरचनालाई अझ प्रभावकारी बनाउँदै स्थानीय सरकारलाई अधिकारसम्पन्न बनाउनुपर्ने आफ्नो मागतर्फ सम्बन्धित निकायले ध्यान नदिए थप आन्दोलनका कार्यक्रम घोषणा गर्ने चेतावनी पनि दिएको छ।