शैलेन्द्र झाको नेतृत्वमा शिक्षा विधेयक मस्यौदा कार्यदल बन्यो
शैलेन्द्र झाको नेतृत्वमा शिक्षा विधेयक मस्यौदा कार्यदल बन्यो
विद्यालय शिक्षा विधेयकको मस्यौदा तयारीलाई तीव्रता दिन शिक्षा तथा खेलकुद मन्त्रालयले सात सदस्यीय मस्यौदा कार्यदल गठन गरेको छ। मन्त्रालयले शिक्षामन्त्रीका प्रमुख सल्लाहकार शैलेन्द्र झाको संयोजकत्वमा यो कार्यदल गठन गरेको हो, जसमा मन्त्रालयका पदाधिकारीसँगै शिक्षा क्षेत्रका विज्ञहरू पनि समेटिएका छन्।
विद्यालय शिक्षा विधेयकको मस्यौदासम्बन्धी प्राविधिक कामलाई शीघ्र अघि बढाउने उद्देश्यले यो कार्यदल गठन गरिएको मन्त्रालयको भनाइ छ। कार्यदलले विद्यालय शिक्षाका विभिन्न पक्षलाई समेटेर दीर्घकालीन सोचका आधारमा विधेयकको मस्यौदा तयार गर्नेछ।
यसअघि तत्कालीन संसद्मा पेस भएको विद्यालय शिक्षा विधेयक प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिमा छलफल भएको थियो, तर विधेयकसम्बन्धी प्रक्रिया अघि बढ्न सकेको थिएन। मन्त्रालयले यसपटक साबिकको विधेयकको मस्यौदालाई समेत आधार बनाउँदै विद्यालय शिक्षाका बहुआयामिक पक्ष, वर्तमान आवश्यकता र दीर्घकालीन सुधारलाई समेट्ने गरी नयाँ मस्यौदा तयार गर्ने जनाएको छ।
विधेयक तयारीका क्रममा सरोकारवालाको वास्तविक माग र आवश्यकता पहिचान गर्न मन्त्रालयले यसअघि नै सातै प्रदेशमा नीति संवाद सञ्चालन गरिसकेको छ। आगामी दिनमा अन्य सरोकारवालासँग समेत क्रमशः संवाद गरी सुझाव संकलन गर्ने मन्त्रालयको तयारी छ।
