चालु आर्थिक वर्षको पहिलो महिनामै एक खर्ब १५ अर्ब रुपैयाँको व्यापार घाटा

चालु आर्थिक वर्षको पहिलो महिनामै एक खर्ब १५ अर्ब रुपैयाँको व्यापार घाटा

काठमाडौं । नेपालले चालु आर्थिक वर्षको पहिलो महिनामै एक खर्ब १५ अर्ब रुपैयाँको व्यापार घाटा बेहोरेको छ ।

भन्सार विभागले सार्वजनिक गरेको आर्थिक वर्ष ०८०/८१ को पहिलो महिनाको रिपोर्टअनुसार एक खर्ब २९ अर्बको वस्तु आयात गर्दा १३ अर्ब ५१ करोडको वस्तुमात्रै निर्यात भएको छ ।

गत आर्थिक वर्षको पहिलो महिनामा एक खर्ब ३१ अर्बको आयात गरिएको थियो भने १४ अर्ब ८० करोडको निर्यात भएको थियो । चालु आर्थिक वर्षमा निर्यात ८ दशमलब ६५ प्रतिशत र आयात १ दशमलब ५६ प्रतिशतले घटेको छ । आर्थिक वर्षको पहिलो महिनामै १ सय ९ देशबाट ९७ प्रकारका वस्तु आयात भएका छन् । 

भन्सार विभागका अनुसार साउनमा पेट्रोलियम पदार्थको आयातमै ठूलो गिरावट देखिएको छ । यस आवमा २१ अर्ब ९८ करोड रुपैयाँको पेट्रोलियम पदार्थको आयात भएको छ । गत आवको साउनमा पेट्रोलियम पदार्थको आयात २५ अर्ब रुपैयाँको भएको थियो ।

आइरन र स्टीलको आयात १२ अर्ब ९५ करोड रुपैयाँको भएको छ । यस आवमा आइरन र स्टीलको आयात सुधार भएको छ । साउन २०७९ मा ११ अर्ब २३ करोड रुपैयाँको आयात भएको थियो ।

एक महिनामा साढे २ अर्ब रुपैयाँको तरकारीजन्य वस्तुको आयात भएको छ । यस महिनामा २ अर्ब ८१ करोडको औषधि आयात भएको छ ।

सवारी साधन र यसको पार्टपूर्जा आयातमा ४ अर्ब २९ करोडको आयात भएको भन्सार विभागले जनाएको छ । गत वर्ष यस्तो वस्तुको आयात ४ अर्ब ६४ करोड रुपैयाँ बराबरको भएको थियो ।

नेपालको सबैभन्दा ठूलो व्यापार भारतसँग रहेको छ । भारतबाट १ अर्ब २४ करोडको आयात भएको छ । ८ अर्ब ४ करोड रुपैयाँको निर्यात भएको छ । भारतसँग साउनमा मात्र ७२ अर्ब ७६ करोड रुपैयाँको व्यापार घाटा रहेको छ ।

चीनबाट २१ अर्ब ९४ करोडको वस्तु आयात हुँदा ३९ करोड रुपैयाँको मात्र निर्यात भएको छ । साउनमा १०९ मुलुक भन्दा बढीसँग वैदेशिक व्यापार भएको भन्सार विभागको तथ्यांक छ ।