अपाङ्गता भएका विद्यार्थीलाई शैक्षिक सामग्री वितरण

अपाङ्गता भएका विद्यार्थीलाई शैक्षिक सामग्री वितरण

सिमरा । नेपाल अपाङ्ग सेवा संघ, बाराद्वारा सञ्चालित स्रोत कक्षामा अध्ययनरत अपाङ्गता भएका बालबालिकाहरुलाई छत्रलक्ष्मी–रुद्रलाल स्मृति प्रतिष्ठानले पानीको बोटलसहित विभिन्न शैक्षिक सामग्री वितरण गरेको छ । नेपाल अपाङ्ग सेवा संघ बाराको व्यवस्थापनमा सिमरामा संचालित बाहिरा तथा सुस्त श्रवण र बौद्धिक अपाङ्ग श्रोत कक्षा संचालनमा सहजता ल्याउनका लागि शैक्षिक सामग्री वितरण गरेको प्रतिष्ठानका अध्यक्ष शान्तलाल मुल्मीले बताए । 

शैक्षिक सामग्री वितरण कार्यक्रममा जीतपुरसिमरा उपमहानगरपालिका वडा नम्बर १ मा संचालित एक मात्र श्रोत कक्षा सरकारी उपेक्षाका कारण प्रभावकारी बनाउन नसकिएको अपाङ्ग सेवा संघ बाराका अध्यक्ष गंगा प्रसाद वाग्लेले बताए । 

स्रोत कक्षामा ३५ जना बहिरा तथा सुस्त श्रवण र बौद्धिक अपाङ्ग विद्यार्थीहरु अध्ययनरत रहेको र स्रोत तथा पूर्वाधारको अभावमा कक्षा ६ सम्म मात्र सञ्चालनमा रहेको र माथिल्लो कक्षा अध्ययन गराउन चितवन पठाउनुपर्ने वाध्यता रहेको जानकारी उनले दिए ।  

अपाङ्ग बालबालिकामैत्री भौतिक संरचना, खेलकुद र मनोरञ्जनका सामग्रीको उपलब्धता पनि नभएकोले बालबालिकको पठनपाठन र क्षमता विकासमा समस्या भएको विद्यालयले जनाएको छ । 

१० जना बहिरा बालबालिकाको लागि २ जना, ८ जना सुस्त श्रवणका लागि २ जना सहयोगी शिक्षकको आवश्यकता हुने भए पनि सो स्रोत केन्द्रमा शिक्षक र सहयोगीको अभाव पनि उत्तिकै रहेको छ । 
सो अभावलाई केही भए पनि राहत होस् भनेर सहयोग प्रदान गरेको छत्रलक्ष्मी रुद्रलाल स्मृति प्रतिष्ठानका अध्यक्ष शान्तलाल मुल्मीले बताए । 

प्रतिष्ठानका तर्फबाट तीर्थमाया मुल्मी, पूर्ण दुवाल, रत्ना चवाल, बुद्ध घलानलगायतले अपाङ्गता भएका विद्यार्थीहरुलाई शैक्षिक सामग्री वितरण गरिएको थियो ।