महिनाको १५ दिन पाँचतारे होटलमा गएर खाने नेताहरूले समाजवाद ल्याउन सक्दैनन् : सीके राउत
महिनाको १५ दिन पाँचतारे होटलमा गएर खाने नेताहरूले समाजवाद ल्याउन सक्दैनन् : सीके राउत
![](https://everestheadlines.com/storage/favicon.png)
![](https://everestheadlines.com/storage/favicon.png)
![महिनाको १५ दिन पाँचतारे होटलमा गएर खाने नेताहरूले समाजवाद ल्याउन सक्दैनन् : सीके राउत](https://everestheadlines.com/media-file/images/2024/06/1719751252-ukWqO.jpg)
काठमाडौँ । जनमत पार्टीका अध्यक्ष डा. चन्द्रकान्त राउत (सीके) ले झन्डै २१ प्रतिशत नागरिक गरिबीको रेखामुनि रहेको देशमा महिनाको १५ दिन पाँचतारे होटलमा खाना खाने नेताहरूले समाजवाद ल्याउन नसक्ने बताएका छन् ।
आज काठमाडौँमा नेकपा (एकीकृत समाजवादी) को राष्ट्रिय महाधिवेशनलाई सम्बोधन गर्दै अध्यक्ष राउतले महिनाको १५ दिन पाँचतारे होटलमा खाना खान जाने नेताहरूले म समाजवादी हुँ भन्न नसुहाउने बताए । उनले कर्णालीका नागरिकले बिरामी हुँदा सिटामोल नपाउने देशमा विदेशमा गएर उपचार गर्ने नेताहरू समाजवादी हुन नसक्ने टिप्पणी गरे । अध्यक्ष राउतले नागरिकका छोराछोरी सरकारी अस्पतालमा जाने तर सरकारी अस्पतालको गुणस्तर सुधार नगर्ने र आफ्ना सन्तानलाई निजी विद्यालयमा भर्ना गर्ने नेताहरू समाजवादी हुन नसक्ने उल्लेख गरे ।
उनले भने, ‘हामी समाजवादका कुरा गर्दछौँ । झन्डै २१ प्रतिशत जनता गरिबीको रेखामुनि बाँचिरहेको देशमा म महिनाको १५ दिन जति पाँच तारे होटलमा गएर खाना खान्छु भने म आफूलाई समाजवादी भन्ने कि नभन्ने ? कर्णालीमा मान्छे बिरामी हुँदा खाने कुरा हुँदैन, नुन पाइरहेका छैनन्, सिटामोल पाइरहेका छैनन् भने म महँगो अस्पतालमा उपचार गराउँछु, विदेशमा गएर उपचार गराउन चाहन्छु भने म समाजवादी हो कि होइन ? म एकातिर रोजगारी दिने कुरा गर्दछु, अर्कोतिर कसरी युवालाई विदेश पठाउने भनेर लाखौँको सङ्ख्यामा सम्झौता गर्दछु भने म समाजवादी हो कि होइन ?’
अध्यक्ष राउतले समाजवादी बन्न हुनुपर्ने मापदण्ड नेताहरूले पालना गर्न नसकेको बताए ।