जनमत पार्टी फेरि सरकारमा सामेल, मन्त्री अनितादेवीले लिइन् शपथ

जनमत पार्टी फेरि सरकारमा सामेल, मन्त्री अनितादेवीले लिइन् शपथ

काठमाडौं । जनमत पार्टीबाट मन्त्री बनेकी अनितादेवी साहले पद तथा गोपनीयताको शपथ ग्रहण गरेकी छन् । राष्ट्रपति कार्यालय शीतल निवासमा राष्ट्रपति रामचन्द्र पौडेलले मन्त्री साहलाई शपथ ग्रहण गराएका हुन् ।

शपथ ग्रहण समारोहमा उपराष्ट्रपति रामसहायप्रसाद यादव, प्रधानमन्त्री पुष्पकमल दाहाल, सभामुख देवराज घिमिरे, राष्ट्रियसभा अध्यक्ष गणेशप्रसाद तिमिल्सिनालगायतको उपस्थिति थियो ।

मन्त्रालय भागबन्डामा असन्तुष्टि जनाउँदै गत चैत १७ गते सत्ता छाडेको जनमत पार्टी फेरि सरकारमा सामेल भएको हो । उसले प्रतिनिधिसभामा समानुपातिक सांसद साहलाई सरकारमा पठाएको हो । उनले सामान्य प्रशासन मन्त्रालय सम्हाल्ने छिन् ।

प्रधानमन्त्री निवास बालुवाटारमा आइतबार बसेको माओवादी पदाधिकारी बैठकले आफ्नै दलका मन्त्री अमनलाल मोदीलाई सरकारबाट फिर्ता बोलाएर उनले सम्हालेको सामान्य प्रशासन मन्त्रालयको जिम्मेवारी जनमत पार्टीलाई दिने निर्णय गरेको थियो ।

पुष्पकमल दाहाल नेतृत्वको सरकारबाट बाहिरिए पनि जनमत पार्टीले समर्थन भने फिर्ता लिएको थिएन । पार्टीले एकसाता अघि नै सरकारमा सामेल गर्न साहको नाम प्रधानमन्त्रीलाई नाम पठाएको थियो । पुस १० गते प्रधानमन्त्री बनेका दाहालको मन्त्रिपरिषद फेरबदल भएको यो १२औँ पटक हो ।

जनमत पार्टीबाट खानेपानीमन्त्री भएका अब्दुल खानले आफूहरुले दाबी गरेको मन्त्रालय नपाएको भन्दै गत चैत १७ गते राजीनामा दिएका थिए । त्यसबेला जनमत पार्टीले उद्योग वाणिज्य तथा आपूर्ति मन्त्रालयमा दाबी गरेको थियो । 

सामान्य प्रशासनमन्त्रीबाट फिर्ता बोलाइएका माओवादी केन्द्रका सांसद मोदी माघ ३ गते मन्त्री नियुक्त भएका थिए । उनी मोरङ- ४ बाट प्रत्यक्ष निर्वाचित पार्टीका सांसद हुन् ।