विधान मस्यौदामाथि आएका सुझावमाथि छलफल गर्न माओवादी स्थायी समिति बस्दै

विधान मस्यौदामाथि आएका सुझावमाथि छलफल गर्न माओवादी स्थायी समिति बस्दै

काठमाडौँ । नेकपा माओवादी केन्द्रको स्थायी समिति बैठक आजदेखि सुरु हुने भएको छ । फागुन पहिलो सातादेखि सुरु हुने विधान अधिवेशनको तयारीका लागि आज र भोलि स्थायी समिति बैठक बस्न लागेको हो । बैठकमा प्रस्तावित मस्यौदा विधानमाथि छलफल हुने जनाइएको छ ।

उपाध्यक्ष पम्फा भुसाल नेतृत्वको समितिले मस्यौदा तयार पारेर यसअघि नै पार्टीलाई बुझाएको थियो । उक्त मस्यौदामा पार्टीका तल्ला कमिटीसम्म छलफल गरेर २४ माघमा लिखित सुझाव आएपछि स्थायी समिति बैठकले ती सुझावमाथि छलफल गर्न लागेको हो । मस्यौदामाथि तलबाट आएका सुझाव र सल्लाह बैठकमा प्रस्तुत गर्ने माओवादीको तयारी छ ।

अध्यक्ष पुष्पकमल दाहाल प्रचण्डले अधिवेशनको तयारीका विषयमा बुधबार पार्टी पदाधिकारीहरूसँग छलफल गरेका थिए । प्रधानमन्त्री निवास बालुवाटारमा भएको छलफलमा विधानलाई चुस्त दुरुस्त बनाउने लगायत प्राविधिक विषयमा छलफल भएको थियो ।

स्थायी समितिले पारित गरेपछि सोही मस्यौदालाई विधान अधिवेशनमा पेस गरिने छ । माओवादी केन्द्रको विधान अधिवेशन आगामी फागुन १ गतेदेखि ३ गतेसम्म काठमाडौंमा हुँदै छ ।