काठमाडौं उपत्यकामा एलपी ग्यासको अभाव, निगमको दाबी 'पूर्ति व्यवस्थित'

काठमाडौं उपत्यकामा एलपी ग्यासको अभाव, निगमको दाबी 'पूर्ति व्यवस्थित'

निगमको दाबी 'पूर्ति व्यवस्थित'

काठमाडौं। विगत केही दिनदेखि राजधानीका विभिन्न क्षेत्रमा खाना पकाउने एलपी ग्यास नपाइएको गुनासो बढेको छ। धेरै उपभोक्ताले सिलिन्डर लिएर ग्यास पसलमा गएपछि पनि हप्तौंसम्म ग्यास नपाएको र दैनिक खाना पकाउनसमेत समस्या भएको बताएका छन्। यसैबीच नेपाल आयल निगमले भने बजारमा वास्तविक अभाव नरहेको र भारतबाट नियमित रूपमा ग्यास आयात भइरहेको दाबी गरेको छ। निगमका अनुसार अभाव हुन सक्ने त्रासले गर्दा उपभोक्ताले आवश्यकताभन्दा बढी ग्यास संग्रह गर्न थालेपछि वितरण प्रणालीमा असर परेको हो।

अर्कोतर्फ, केही स्थानीय व्यवसायीले जानाजान अभाव देखाएर कालोबजारीमा संलग्न भएको आशंका पनि सर्वसाधारणले व्यक्त गरेका छन्, र विगतमा पनि यस्तै प्रवृत्ति दोहोरिएको उदाहरण दिँदै पारदर्शी अनुगमनको माग गरेका छन्। समस्या समाधानका लागि निगमले काठमाडौं उपत्यकामा आफ्नै टेकुस्थित कार्यालयबाट समेत ग्यास बिक्री वितरण गर्ने व्यवस्था मिलाएको छ र ग्यास नपाएमा हटलाइन नम्बर ०१–५९७१९०२ मा सम्पर्क गर्न उपभोक्तालाई आग्रह गरेको छ। साथै, आयातित ग्यास बुलेटमा होल्ड हुने समस्या हटाउन निगमले केही समयका लागि पूरा भरिएको सिलिन्डर नै बजारमा पठाउने योजना बनाएको छ।