अध्यादेश ल्याएर भए पनि संघीयता कार्यान्वयन गर्न समाजवादी मोर्चाको सुझाव

अध्यादेश ल्याएर भए पनि संघीयता कार्यान्वयन गर्न समाजवादी मोर्चाको सुझाव

काठमाडौँ । सत्तारुढ दलहरू माओवादी केन्द्र, जनता समाजवादी पार्टी, एकीकृत समाजवादी र नेत्रविक्रम चन्द नेतृत्वको नेकपा सम्मिलित समाजवादी मोर्चाको बैठकले सरकारले संघीयता कार्यान्वयनमा जोड दिनुपर्ने निष्कर्ष निकालेको छ । संघीयता कार्यान्वयनमा देखिएका कानुनी अड्चन हटाउनका लागि अध्यादेश ल्याएर भएपनि अगाडि बढ्नुपर्ने विषयमा समाजवादी मोर्चामा छलफल भएको हो ।

समाजवादी मोर्चाको बुधबार प्रधानमन्त्री निवास बालुवाटारमा बसेको बैठकमा संघीयता कार्यान्वयनका लागि अग्रसर हुनुपर्ने विषयमा छलफल भएको जसपाका नेता राजेन्द्र श्रेष्ठले जानकारी दिए । मोर्चाको बैठकमा भएका छलफलबारे उनले भने, 'संघीयता कार्यान्वयन गर्नका लागि सरकार अग्रसर भएर दृढतापूर्वक उभिनुपर्छ भन्ने विषयमा छलफल भयो ।' संघीयता कार्यान्वयन नहुँदा र प्रदेश संरचनालाई संविधानले स्पष्ट तोकेका अधिकार नदिँदा संघीयता व्यवस्थामाथि नै प्रश्न उठेको विषयमा छलफल भएको श्रेष्ठको भनाइ थियो ।

प्रदेशहरूलाई कर्मचारी र सुरक्षा संयन्त्र दिनुपर्ने विषयमा छलफल भएको उनले जानकारी दिए । 'संविधानको अनुसूचीमा संघ, प्रदेश र स्थानीय तहको अधिकार व्यवस्था छ । त्यो कार्यान्वयन गर्न नसक्नु कमजोरी हो,' उनले भने, 'प्रदेशलाई दिनुपर्ने अधिकार नदिँदा प्रदेश बोझ हो कि भन्ने सन्देश प्रवाह भइरहेको छ । यसलाई कार्यान्वयन गर्न पनि समाजवादी मोर्चाले सल्लाह गरेको छ । अध्यादेश नै ल्याएर भएपनि यो कार्यान्वयन गर्नुपर्छ भन्ने हामीले सुझाव दिएका छौँ ।’

संघीयताको कार्यान्वयनका लागि अध्यादेश ल्याएर भएपनि अगाडि बढ्नुपर्ने विषयमा प्रधानमन्त्री पुष्पकमल दाहाललाई सुझाव दिइएको श्रेष्ठले बताए । त्यस्तै समाजवादी मोर्चाको जिल्ला संयोजन समिति गठन गर्ने र मुलुकका मुख्य सहरहरूमा संघीयता, गणतन्त्र, धर्मनिरपेक्षता लगायतका पक्षमा कार्यक्रम गर्ने छलफल भएको श्रेष्ठले जानकारी दिए ।