कैद माफी पाएका रिगललाई जेल चलान गर्न माग गर्दै माइतीघरमा आन्दोलन
कैद माफी पाएका रिगललाई जेल चलान गर्न माग गर्दै माइतीघरमा आन्दोलन
एभरेष्ट हेडलाइन्स
एभरेष्ट हेडलाइन्स
काठमाडौँ । महिला अधिकारकर्मीहरूले संविधान दिवसको अवसरमा कैद छुट पाएका योगराज ढकाललाई पुनः थुनामा राख्न माग गर्दै प्रदर्शन गरेका छन् । बुधवार महिला अधिकारकर्मीहरूले कैद छुट फिर्ता गरी ढकाललाई जेल चलान गर्न माग गर्दै विरोध प्रदर्शन गरेका हुन् ।
उनलाई कैद मिनाहा दिइएको भन्दै मृतककी पत्नी भारती मानन्धर माइतीघरमा अनसनरत छिन् । उनीहरुले चेतन मानन्धरको आत्मालाई शान्ति दिन माग गर्दै शान्तिपूर्ण खबरदारी विरोध र्याली गरेका छन् । नेपालगन्ज बजारमा खुँडा प्रहार गरेर व्यक्ति हत्या गरेको अभियोगमा जन्मकैदको सजाय पाएका योगराज ढकाल (रिगल) लाई सरकारले संविधान दिवसको अवसर पारेर बाँकी कैद मिनाहा गरेको थियो ।
रिगल २०७२ असार २८ मा नेपालगञ्जका चेतन मानन्धरको हत्या गरेको अभियोगमा दोषी ठहर भएका थिए । रिगलविरुद्धको मुद्दामा सर्वोच्च अदालतले सरकार र राष्ट्रपति कार्यालयको नाममा समेत कारण देखाऊ आदेश जारी गरिसकेको छ ।
आन्दोलनमा उत्रिएका महिला अधिकारकर्मी अञ्जु केसी श्रेष्ठले यो घटना संविधानको धज्जी उडाएको बताइन् । त्यस्तै अर्की आन्दोलनकर्मी कल्पना बस्नेतले भारतीले न्याय पाउनुपर्ने र महिलामाथि हिंसा गर्नु नहुने बताइन् । उनले कैद मिनाहा दिने काम फिर्ता गर्नुपर्ने बताइन् ।
