भोटेकोशीमा बाढीको त्रास, उद्धारमा खट्यो सेना
भोटेकोशीमा बाढीको त्रास, उद्धारमा खट्यो सेना
उद्धारमा खट्यो सेना
सिन्धुपाल्चोक — भोटेकोशी नदी क्षेत्रमा आकस्मिक बाढीको जोखिम बढेसँगै सुरक्षा निकायहरू उच्च सतर्कतामा जुटेका छन्। जल तथा मौसम विज्ञान विभागअन्तर्गतको बाढी पूर्वानुमान महाशाखाका अनुसार सिन्धुपाल्चोक जिल्लामा बग्ने साना-ठूला नदीहरूमा आकस्मिक बहावको जोखिम रहेकाले तटीय क्षेत्रमा बसोबास गर्नेहरूलाई सतर्कता अपनाउन आग्रह गरिएको छ।
सिन्धुपाल्चोकको भोटेकोशी नदी उत्तरतर्फ तिब्बतसँग जोडिएको हुनाले त्यहाँको मौसमी अवस्थाले सिधै यस क्षेत्रमा असर पार्ने गर्छ। हालसालै प्राप्त चिनियाँ सूचनाले तिब्बततर्फ भारी वर्षा हुने संकेत गरेपछि भोटेकोशी तटीय क्षेत्र थप उच्च जोखिममा परेको विज्ञहरूले औंल्याएका छन्। सीमापारिको मौसम सूचना समयमै आदानप्रदान भएमा तल्लो तटीय क्षेत्रमा हुनसक्ने क्षति उल्लेखनीय रूपमा घटाउन सकिने विज्ञहरूको भनाइ छ।
बाढीपहिरो तथा नदी कटानबाट प्रभावित क्षेत्रमा नेपाली सेनाले विपद् प्रतिकार्यलाई निरन्तर तीव्रता दिँदै आएको छ। फसेका र बेपत्ता भएका व्यक्तिको खोज तथा उद्धारका लागि सेनाले सुरक्षा निकाय र स्थानीयवासीसँगको सहकार्यमा टोली परिचालन गर्ने गरेको छ। आवश्यक परेमा तत्काल उद्धार तथा राहत परिचालन गर्न हेलिकप्टरसमेत तयारी अवस्थामा राखिने गरिएको छ, र प्रभावित क्षेत्रमा खोज, उद्धार र राहत वितरणका लागि विशेष क्षमतायुक्त टोलीहरू २४ सै घण्टा तत्पर रहने गरेका छन्।
निरन्तर वर्षाका कारण सिन्धुपाल्चोकसहित काभ्रेपलाञ्चोक, रसुवा, नुवाकोट लगायतका जिल्लामा विभिन्न सडकखण्ड अवरुद्ध भएका छन्, जसले स्थानीय यातायातमा समेत असर पारेको छ। सुरक्षा निकायले जोखिमपूर्ण सडकखण्डमा राति सवारीसाधन सञ्चालनमा रोक लगाउने लगायतका सावधानीमूलक कदम चालिरहेका छन्।
सम्बन्धित निकायहरूले भोटेकोशी तटवर्ती बस्तीका बासिन्दालाई नदीको बहाव बढ्ने संभावनालाई ध्यानमा राखी सुरक्षित स्थानमा सर्न र आकस्मिक अवस्थामा तत्काल सूचना दिन आग्रह गरेका छन्। मनसुन सक्रिय रहुन्जेल यस्तो सतर्कता कायम राख्नुपर्ने विज्ञहरूको सुझाव छ।
