नोभेम्बर ५ र ६ मा २४ घण्टे स्टार्टअप ह्याकाथन

नोभेम्बर ५ र ६ मा २४ घण्टे स्टार्टअप ह्याकाथन

उत्कृष्ट तीन स्टार्टअप टोलीले लगानीकर्ता तथा मार्गदर्शकसमक्ष आफ्नो उद्यम प्रस्तुत गर्ने अवसर पाउने

काठमाडौं – नेपाल उद्योग परिसंघ युवा उद्यमी मञ्च (सीएनआईवाईईएफ) र द स्टार्टअप नेटवर्क नेपाल (टीएसएन) को संयुक्त आयोजनामा आगामी नोभेम्बर ५ र ६ मा २४ घण्टे स्टार्टअप ह्याकाथन हुने भएको छ। काठमाडौं वर्ल्ड स्कुलमा हुने यो कार्यक्रम स्टार्टअप ह्याकाथन भोल्युम ४ का रूपमा आयोजना गरिन लागेको हो।

नेपालमा स्टार्टअप उद्यमशीलताको विकास गर्ने, नवप्रवर्तनलाई प्रोत्साहन दिने तथा सम्भावनायुक्त उद्यमलाई लगानीका अवसरसँग जोड्ने उद्देश्यले ह्याकाथन आयोजना गरिएको आयोजकले जनाएको छ। ह्याकाथनमा सहभागी टोलीहरूले सीमित समयभित्र आफ्ना व्यावसायिक अवधारणालाई परिष्कृत गर्दै समाधानको सम्भाव्यता, व्यावसायिक मोडेल, बजारको आवश्यकता र विस्तारको योजनासहित निर्णायक मण्डलसमक्ष प्रस्तुत गर्नेछन्।

कार्यक्रमबाट उत्कृष्ट तीन स्टार्टअप टोली छनोट गरिनेछ। छनोट भएका टोलीले आगामी चरणमा लगानीकर्ता, मार्गदर्शक तथा उद्यमशीलता क्षेत्रका सरोकारवालासमक्ष आफ्ना व्यावसायिक अवधारणा प्रस्तुत गर्ने अवसर पाउनेछन्। आयोजकका अनुसार ह्याकाथनको उद्देश्य उत्कृष्ट विचार पहिचान गर्नु मात्र नभई ती विचारलाई दिगो व्यवसायमा रूपान्तरण गर्न आवश्यक लगानी, मार्गदर्शन र व्यावसायिक सञ्जालसँग जोड्नु पनि हो।

नेपालका प्रारम्भिक चरणका स्टार्टअपहरू लगानीमा पहुँच, बजारमा आफ्नो पहिचान स्थापित गर्ने अवसर, अनुभवी मार्गदर्शक तथा व्यावसायिक सञ्जालको अभाव जस्ता चुनौतीको सामना गर्दै आएका छन्। यस्तो अवस्थामा ह्याकाथनले उद्यमीहरूलाई आफ्ना समाधान परीक्षण गर्ने, व्यावसायिक अवधारणा सुधार गर्ने र सम्भावित लगानीकर्तासमक्ष पुग्ने अवसर प्रदान गर्ने अपेक्षा गरिएको छ।

सीएनआईवाईईएफ र द स्टार्टअप नेटवर्क नेपालको सहकार्यले युवा उद्यमीहरूलाई प्रोत्साहन गर्नुका साथै नेपालमा नवप्रवर्तनमा आधारित उद्यमशीलता संस्कृतिको विकासमा योगदान पुर्‍याउने आयोजकको विश्वास छ। विशेषगरी, ह्याकाथनले प्रतिभाशाली उद्यमीलाई पहिचान गर्ने, उनीहरूलाई प्रतिस्पर्धात्मक मञ्च प्रदान गर्ने र लगानीका सम्भावनासँग जोड्ने कार्यलाई व्यवस्थित बनाउने अपेक्षा गरिएको छ। आयोजकका अनुसार यो ह्याकाथन भोलिका सम्भावनायुक्त व्यवसाय निर्माण गर्ने उद्यमीका लागि आफ्नो विचारलाई अवसरमा रूपान्तरण गर्ने महत्त्वपूर्ण मञ्च हुनेछ र यसले देशको उद्यमशीलता इकोसिस्टमलाई थप सशक्त बनाउनेछ।

कार्यक्रममा सहभागी हुन इच्छुक स्टार्टअप तथा नवप्रवर्तकहरूले आयोजकले उपलब्ध गराएको दर्ता माध्यमबाट आवेदन दिन सक्नेछन्। थप जानकारी तथा दर्ताका लागि द स्टार्टअप नेटवर्क नेपाल (टीएसएन) लाई व्हाट्सएप नम्बर ९८४३८७२८७० मा सम्पर्क गर्न सकिनेछ।