सहकारी पीडितको बचत रकम सरकारले फिर्ता गर्दैन : सूर्य थापा

सहकारी पीडितको बचत रकम सरकारले फिर्ता गर्दैन : सूर्य थापा

काठमाडौँ । सहकारी छानबिन संसदीय समितिले सहकारी पीडितको बचत रकम सरकारले फिर्ता गर्न नसक्ने अवस्था रहेको जनाएको छ । समितिले सम्बन्धित सहकारीबाट नै फिर्ता गराउनुपर्ने प्रस्ट पारेको छ । 

सोमबार सिंहदरबारमा बसेको समितिको बैठकमा सभापति सूर्य थापाले अहिले अर्थतन्त्रको अवस्था हेर्दा सरकारले पीडितहरूको बचत फिर्ता गर्न सक्ने अवस्था नरहेको भन्दै कानुनी प्रक्रियाबाट सञ्चालकबाट नै फिर्ता गर्नुपर्ने व्यवस्था मिलाउनुपर्ने जनाए ।  

उनले भने,‘मुलुकको अर्थतन्त्रको अवस्था हेर्दा सरकारले सहकारी पीडितहरूको बचत फिर्ता गर्न सक्छ जस्तो लाग्दैन । बचत जसले सङ्कलन गर्‍यो र दुरुपयोग गर्‍यो सम्बन्धित सहकारीको मुख्य काम फिर्ता गर्ने हो । त्यसैले सहकारी सञ्चालकले आर्जन गरेको चल अचल सम्पत्ति छ त्यही भित्रबाट प्रक्रिया मिलाएर फिर्ता गराउनुपर्छ ।’ 

उनले सहकारी क्षेत्र समस्याग्रस्त भएको भए तापनि आम रूपमा सहकारीको सिद्धान्त र मूल्य मान्यता अन्तर्गत सञ्चालित सहकारीहरूमा कुनै समस्या नरहेको बताए । फरक ढङ्गले बचत जम्मा गर्ने र दुरुपयोग गर्ने साथै सहकारीको सामान्य सिद्धान्त विपरीत चलेका सहकारीमा समस्या रहेको भन्दै त्यसको समाधान गर्न छलफल जारी रहेको उनको भनाइ छ । 

उनले भने,‘सहकारी क्षेत्र समस्याग्रस्त भएको भए तापनि आम रूपमा सहकारीको सिद्धान्तको मूल्य मान्यता अन्तर्गत सञ्चालित फेस टु फेस सदस्यहरूले एकले अर्कालाई चिन्ने, मर्म र मान्यता अनुसार चलेका सहकारीहरूमा समस्या छैन । फरक ढङ्गले बचत जम्मा र दुरुपयोग गर्ने सहकारीको सामान्य सिद्धान्त विपरीत चलेका व्यक्ति र संस्थाहरूमा मुख्य समस्या पाइयो । यसमा समाधान गर्न छलफल गरेका छौँ ।’