एनएमसी-कोअपका डेढ लाख सदस्यले अब पाउनेछन् एमबैंकको डिजिटल बैंकिङ सुविधा

एनएमसी-कोअपका डेढ लाख सदस्यले अब पाउनेछन् एमबैंकको डिजिटल बैंकिङ सुविधा

काठमाडौं। नेपालको अग्रणी डिजिटल वित्तीय सेवा प्रदायक एमबैंक टेक्नोलोजिज प्रालि र एनएमसी मल्टिपर्पज को-अपरेटिभ लिमिटेड (एनएमसी-कोअप) बीच एकीकृत डिजिटल बैंकिङ, भुक्तानी तथा ऋण सेवा एउटै प्लेटफर्ममार्फत उपलब्ध गराउने उद्देश्यले रणनीतिक साझेदारी भएको छ।

उक्त सम्झौतामा जेठ २९ गते (शुक्रबार) हस्ताक्षर भएको थियो भने सेवा साउन ७ गते (बिहीबार) देखि औपचारिक रूपमा सञ्चालनमा आएको छ। देशभर ५७ सेवा केन्द्रमार्फत एक लाख ५० हजारभन्दा बढी सदस्यलाई सेवा प्रदान गर्दै आएको एनएमसी-कोअपले अब आफ्ना सदस्यलाई एमबैंकको प्लेटफर्ममार्फत थप व्यापक डिजिटल वित्तीय सेवा उपलब्ध गराउने भएको छ।

यस साझेदारीअन्तर्गत एनएमसी-कोअपका सदस्यहरूले एउटै मोबाइल एप्लिकेसनमार्फत मोबाइल बैंकिङ, क्यूआर पेमेन्ट, फन्ड ट्रान्सफर, युटिलिटी पेमेन्ट, डिजिटल पेमेन्ट तथा केवाइएम अपडेट लगायतका सेवा प्राप्त गर्न सक्नेछन्।

साझेदारीले डिजिटल लेन्डिङ क्षेत्रमा पनि विशेष जोड दिएको छ। चरणबद्ध रूपमा सदस्यहरूले फिक्स्ड डिपोजिट तथा पिरियडिक खाताविरुद्ध ऋण, ऋण भुक्तानी, ऋण विवरण (लोन स्टेटमेन्ट) तथा नयाँ ऋण आवेदन जस्ता सेवा मोबाइल प्लेटफर्ममार्फत प्राप्त गर्न सक्नेछन्। डिजिटल प्रक्रियामार्फत आवश्यक कागजात पेश गर्ने र ऋण आवेदनको अवस्थाबारे जानकारी लिन सकिने भएकाले शाखामा प्रत्यक्ष उपस्थित हुनुपर्ने आवश्यकता कम हुने अपेक्षा गरिएको छ।

एमबैंक र एनएमसी-कोअपका अनुसार सेवा चरणबद्ध रूपमा विस्तार गरिनेछ। प्रारम्भिक चरणमा मोबाइल बैंकिङ, क्यूआर पेमेन्ट तथा फन्ड ट्रान्सफर जस्ता आधारभूत सेवामा जोड दिइनेछ भने पछिल्ला चरणमा डिजिटल लेन्डिङ र थप उन्नत सेवाहरू क्रमशः थपिँदै जानेछन्। यसले सदस्यहरूलाई नयाँ प्रविधिसँग सहज रूपमा अभ्यस्त हुन र सेवाको गुणस्तर सुनिश्चित गर्न मद्दत पुर्‍याउने कम्पनीको भनाइ छ।

साझेदारीबारे प्रतिक्रिया दिँदै एनएमसी मल्टिपर्पज को-अपरेटिभ लिमिटेडका प्रमुख कार्यकारी अधिकृत (सीईओ) तथा हालै राष्ट्रिय सहकारी बैंक लिमिटेडका अध्यक्ष निर्वाचित लक्ष्मीप्रसाद उप्रेतीले सहकारी क्षेत्रको दिगो विकासका लागि प्रविधिमैत्री सेवा विस्तार अपरिहार्य रहेको बताउँदै यस साझेदारीले सदस्यलाई सुरक्षित, सहज र आधुनिक वित्तीय सेवा प्रदान गर्ने विश्वास व्यक्त गर्नुभयो।

त्यसैगरी एमबैंकका प्रमुख कार्यकारी अधिकृत (सीईओ) सञ्जय महासेठले भन्नुभयो, "यो साझेदारी केवल मोबाइल बैंकिङ सेवाको विस्तार मात्र होइन, सहकारी क्षेत्रलाई डिजिटल प्रविधिमार्फत रूपान्तरण गर्ने साझा पहल हो। बैंकिङ, पेमेन्ट र लेन्डिङलाई एउटै डिजिटल इकोसिस्टममा एकीकृत गरेर हामी सदस्यलाई अझ सरल, सुरक्षित र आधुनिक वित्तीय अनुभव प्रदान गर्न चाहन्छौं।"

यो साझेदारीले एमबैंकको 'वन प्लेटफर्म फर बैंकिङ, पेमेन्ट्स एन्ड लेन्डिङ' भन्ने दृष्टिकोण तथा 'वन एप, मल्टिपल सर्भिसेज' भन्ने मूल अवधारणालाई थप सुदृढ बनाएको कम्पनीले जनाएको छ। साथै, यसले नेपालभर सहकारी, लघुवित्त र वित्तीय क्षेत्रमा डिजिटल वित्तीय पहुँच विस्तार गर्ने कम्पनीको प्रतिबद्धतालाई पनि मजबुत बनाएको छ।

नेपालमा हालका वर्षहरूमा सहकारी तथा लघुवित्त क्षेत्रमा डिजिटल वित्तीय सेवाको माग निरन्तर बढ्दै गएको छ। ग्रामीण तथा शहरी दुवै क्षेत्रका सदस्यहरूले शाखामा नपुगीकनै वित्तीय कारोबार गर्न पाउने सुविधा खोज्दै आएका छन्। यस पृष्ठभूमिमा एमबैंक र एनएमसी-कोअपबीचको यो साझेदारी सहकारी क्षेत्रलाई प्रविधिमैत्री बनाउने प्रयासहरूमध्ये एक महत्त्वपूर्ण कदमको रूपमा हेरिएको छ।

एमबैंकले यसअघि पनि विभिन्न सहकारी संस्था तथा वित्तीय संस्थाहरूसँग यस्तै प्रकृतिका साझेदारी गर्दै आएको छ, जसले कम्पनीलाई नेपालको डिजिटल वित्तीय सेवा क्षेत्रमा भरपर्दो प्रविधि साझेदारका रूपमा स्थापित गर्न मद्दत गरेको छ। एनएमसी-कोअपसँगको यो नयाँ सम्झौताले सो अनुभव र विशेषज्ञतालाई थप विस्तार गर्ने अपेक्षा गरिएको छ।

एमबैंक नेपालमा आधारित डिजिटल वित्तीय सेवा प्रदायक कम्पनी हो। कम्पनीले एक दशकभन्दा बढी समयदेखि सहकारी, लघुवित्त संस्था तथा वित्तीय संस्थाहरूलाई मोबाइल बैंकिङ, डिजिटल पेमेन्ट, क्यूआर पेमेन्ट, डिजिटल लेन्डिङ लगायतका प्रविधि समाधान उपलब्ध गराउँदै आएको छ।

एनएमसी मल्टिपर्पज को-अपरेटिभ लिमिटेड नेपालको अग्रणी बहुउद्देश्यीय सहकारी संस्थामध्ये एक हो। संस्थाले बचत तथा ऋण, कृषि, दुग्ध, चिया, रेमिट्यान्स तथा अन्य समुदायमुखी सेवामार्फत एक लाख ५० हजारभन्दा बढी सदस्यलाई सेवा प्रदान गर्दै आएको छ।