मन्त्री गौरी यादवको राजीनामा

मन्त्री गौरी यादवको राजीनामा

काठमाडौं। उद्योग, वाणिज्य तथा आपूर्तिमन्त्री गौरी कुमारी यादवले आफ्नो पदबाट राजीनामा दिएकी छिन्। मन्त्री यादवले बिहीबार प्रधानमन्त्री बालेन्द्र शाहसमक्ष राजीनामा बुझाएकी हुन्।

एलपी ग्यासको अभाव र कालोबजारीका लागि व्यवसायी तथा उद्यमीहरूलाई दोष दिने विवादास्पद अभिव्यक्तिपछि यादवले राजीनामा दिएकी हुन्। बुधबार संसदको उद्योग समितिमा मन्त्री यादवले ग्यास अभावको मुख्य कारण व्यवसायी र उद्यमीहरूको बदमासी रहेको बताएकी थिइन्। साथै कर्मचारीहरूले सहयोग नगरेको र लाखौं रुपैयाँ लिएर इजाजतपत्र दिइएको समेत उनले गुनासो गरेकी थिइन्।

यादवले देशमा हाल सञ्चालनमा रहेका ५८ वटै एलपी ग्यास कम्पनीको इजाजतपत्र खारेज गर्नुपर्ने र देशलाई त्यति धेरै ग्यास उद्योग आवश्यक नपरेको, बरु दुईवटा मात्रै पर्याप्त हुने तर्क अघि सारेकी थिइन्। उनको यस अभिव्यक्तिले ग्यास व्यवसायीहरूको कडा विरोध खेप्नुपरेको थियो र यो विषय प्रधानमन्त्रीसमक्ष समेत पुगेको थियो।

समितिमा यस्तो अभिव्यक्ति दिएको भोलिपल्टै मन्त्री यादवले राजीनामा दिएकी हुन्। गत चैत २७ गते मन्त्री पदको शपथ लिएकी यादव यसअघि पनि विवादमा तानिएकी थिइन्; पेट्रोलको मूल्य वृद्धि हुँदा जानकारी चुहावट गरेको आरोप उनीमाथि लागेको थियो।