'एक्लै काफी छु भन्ने घमण्ड नगर्नुस्': एमालेको चेतावनी
'एक्लै काफी छु भन्ने घमण्ड नगर्नुस्': एमालेको चेतावनी
एमालेको चेतावनी
काठमाडौं — नेकपा (एमाले)ले प्रधानमन्त्रीलाई विपद्को बेला 'आफू एक्लै पर्याप्त छु' भन्ने घमण्ड नगर्न भनेको छ। पार्टीले सरकारको विपद् व्यवस्थापन शैलीमाथि गम्भीर प्रश्न उठाएको छ।
मंगलबार प्रतिनिधिसभा बैठकमा सम्बोधन गर्दै एमाले सांसद पद्मा अर्यालले सरकार बाढीपछिको काममा धेरै ठाउँमा चुकेको आरोप लगाइन्। उनका अनुसार विपद्पछि तत्काल गर्नुपर्ने धेरै काम समयमै भएनन्।
अर्यालले सबैभन्दा गम्भीर कमजोरी भनेको बाह्य सहयोग जुटाउनमा भएको बताइन्। "सरकारले तत्काल सार्वजनिक आह्वान, अनुरोध र कूटनीतिक पहलमार्फत सहयोग माग्नुपर्थ्यो। हामी यहाँ चुक्यौं," उनले भनिन्। साथै विद्यालय र क्याम्पसका इन्जिनियर तथा विभिन्न क्षेत्रका विज्ञहरूलाई राहत कार्यमा समावेश गर्न नसकेकोमा पनि उनले असन्तोष जनाइन्।
प्रधानमन्त्रीलाई प्रत्यक्ष सम्बोधन गर्दै अर्यालले भनिन्, "देश र जनताको माया प्रधानमन्त्रीलाई मात्र बढी हुने होइन। हामीलाई पनि उत्तिकै छ।" उनका अनुसार विपद् व्यवस्थापन कुनै एउटा व्यक्ति वा पार्टीको मात्र जिम्मेवारी होइन, यो सामूहिक राष्ट्रिय दायित्व हो।
अर्यालले सरकारलाई यस अनुभवबाट शिक्षा लिँदै तुरुन्तै सर्वदलीय बैठक बोलाई छलफल गर्न सुझाव दिइन्, तर त्यो पनि अझै हुन नसकेकोमा उनले खेद व्यक्त गरिन्। "काम भएकै छैन भन्न खोजेको होइन, तर अझै धेरै गर्न सकिन्थ्यो," उनले थपिन्।
